เวนตานหาคนตาย

ขึ้นสัคเคหลวงก่อน

นะโม ตัสสะ ภะคะวะโต อะระหะโ ตสัมมา สัมพุทธัสสะ ว่า 3 หน

โย สันนิสินโน วะระโปธิมุเล มารังสะเสนัง มะหันติ๋ง วิชัยโย สันโพธิมาคัจฉิง

อะนันตั๋ญญาโณ โลกุตตะโม ตั๋ง ปะณะมามิพุทธัง ตั๋ง ปะณะมามิธัมมัง ตั๋ง ปะณะมามิ สังฆัง

โภนโต๋ เตวะสังฆาโย เต้ปป๊ะก๊ะณะนาตังหลาย มวลหมู่อันสถิตอยู่กู่วิมานจุ่งขานจักป่าว ประวัติกล่าวของตาน ตังเตวดาอันรักษา ขันธสันดานศรัทธาจู้ผู้ รักษากู่หอเฮือน อันรักษาปี๋ เดือน วัน ยาม ตังเตวดาอันรักษาวัดวาอารามและเตวดารักษาไร่นาก๋ามะเขต ผะเต้ศน์ บ้านเมืองเหมืองฝายของมูลศรัทธา และรักษาเจนบ้านเจนเมือง ตังพรหมเตวดาจื่นเจียงคานใสสะอาด ปัพพะต๋ารุกขะจาติใสสีธุวะหะกะมณีเมฆขลา เจิญเตวดาตีพย์เต้ศน์นอมนิ้วแนตรโมตะนาตาน พระอินตาภูบาลต๋นองค์ตานฟ้าเฟื้องตังต้าวเจื่องขุนพรหม จตุโลกตังสี่ ยักษี ยักษา มีฤทธานุฦาพตังกุ๋มฦณฑ์ผาบไพรี ตังนางธรณี ต๋นจ๋ำบุญต๋นจ๋ำบาป ต๋นจ๋ำเส้นก้านน้ำหยาดหมายตาน ตังพญามารต๋นใจหาญหาดห้าว ติ๊พย์เต๊ปต้าวป่ายบนหนอากาศ ป่ายใต้ลอดธรณีศรีกุตตะอามาตย์ตังนาดน้ำ ปะระไมไอศวร อันเจิญมวลหมู่เจ้า เข้ามาสู่โมต๊ะนาตาน เซิ่งวะระขียาตานอันผู้ข้าตังหลาย จักได้หื้อตานในทีฆาก๋าละบัดนี้ยามนี้ยามนี้แต้ดีหลี

สาธุโอก๋าสะ สิริวิสุทธ์ มะ กุต ตะ ปะ วะ โรจน์โสดอุดม พระบรมพุทธาทิรัตนา ถะไร๋ผ่านแผ้ว พะแก้วเจ้า๓ ผะการ ในทีฆาก๋าละละวันนี้ ก็เป็นวันดี เป็นวันศรีศุภะมังคะละอันประเสริฐลำเลิศกว่าวันและยามตังหลาย

บัดนี้ยามนี้ หมายมี..........เป็นเก้าพร้มกับด้วย.........จุ๊ภู้จุ๊คนได้สะล๋งขงขวายตกแต่งพร้อมนอมมายัง มะธบุปผาราจาดวงดอก ตังข้าวตอกดอกไม้และลำเตียน พร้อมด้วยโอต๊ะนะภิกขาหาร และสะหะบริวารตานตังหลายมวลฝูงนี้มาถะปั๋นนาตั้งไว้ กลางกองส่องหน้า ผะถะไร๋ระตะนะผ่านแผ้ว พระแก้วสามประการ มีผะหมานเต๋านี้แล้วอันจักหื้อตานเถิง พระพุทธเจ้า พระธรรมเจ้า พระสังฆะเจ้า ว่าสันนั้นแต้ดีหลี

บัดนี้ ศรัทธาผู้ข้าตังหลาย ขอโอกาสอาราธนา พระแก้วเจ้าสามผะการ จุงมีธรรมเมตต๋าอว่ายหน้าปะฏิคะหะรับเอาไว้แล้ว เพื่อจักอุทิสะสวนบุญกุศล ไปหายังผู้มรณาจุติตายไปสู่โลกปายหน้า ผู้มีนามก๋รจื่ว่า.......นาย ก......แม่นว่าได้วางอารมอาลัยไป จิตใจเจ๋ตะนาไปบ่จาง ไปตกห้องหว่างอบาย ต๋ายเป็นเผดตู๊กขะเวต๊ะนา ฮ้อนบ่ได้อาบอยากบ่อได้กิน ดังอันก็ดี ขอเจิญเต๊ปป๊ะมะเหสิขา เตวะบุตร เตวะดาต๋นมีฤทธีแก่กล้า จุงมานำเอาพละกุศลผลบุญตานตังหลายมวลฝูงนี้ไปฮอดไปเติงยังดวงวิญญาณของ......นาย ก....หื้อได้กินได้บรโภค ป้นตี่ยากพรากจากตี่ตุ๊กหื้อได้เถิงสุขเป็นตี่แล้ว คือเวียงยอดเนระปาน นั้นจุงจักมีเตี้ยงแต้ดีหลี

อะนิจจ๋า วะตะสังขารา โสตุ ธะนานัง จุงจักฟัง วะจะนัง อะโห วะตะ ตุ๊กขัง ด้วยมีแต้ใส้สัตว์โลกใต้โลก๋า ป๊ะหุ ตุ๊กขาแสนสิ่งตุ๊กล้ำยิ่งเหลือผะมาน ต่วยเตียวสงสารเวียนแว่ก๋รรมหากแน่นำมา กรรมตายมาง๊าติ์ก่อน ก๋รรมบ่อผ่อนศูนย์หาย ฉันเตียวหนโลกใต้ เถิงได้เถิดเป็นคน บ่ว่ามีจ๋นตุ๊กข์ยากตามก๋รรมวิบากไผมันอันว่าสังขาร เป็นของบ่หมั้นเตี่ยว รู้ขว้ำเหงียงไปมา ตั้งแต่เกิดมาฮู้ชราเฒ่าแก่ ฮู้ปิ้นแผ่เจ็บเป็น ต๋ามกฎเก๋ณฑ์มัจจุราช เป็นพยาธินานาเจ๊บปวดก๋ายาในนอก เหลื่อตี่จักบอกปั๋นไผ มาเป็นตุ๊กข์ใจ๋ยามเจ็บป่วย ไผบ่จ่วยตั๋วไผ เจ็บเหลื่อใจขนาด เจ็บด้วย พยาธิของตั๋ว ใจ๋เมามัวแสบไหม้ ฮ้องไห้ อืดโอยคาง ลางเตื่อเบาบางเป็นหว่าง ลางเตื่อถี่หางคืนมาเป็นขาลำบาก เปียธิราชหาก มาตัน เถิงมีเงินปันหมื่นแสนโกฏิบ่เป็นประโยชน์ สักรายเถิงป็นจ้าวนายบ่าไพร่ ยศศิกดิ์มใหญ่ ลือชา มั่งมีเงินทองบาทใต้ เอาฝากไว้หลายหมื่นหลายแสน ด้วยความหวงแหนจิ๊ถี่ ถะหนี่ด้วยเงิน ทองอันเป็นปายนอง ฮู้เข้าออกเป็นยาม เถิงภัยลามเกิดใกล้ยามเจ็บไข้เกิดมีมาได้แต่อาทะวาเจ็บปวด จิตใจ๋ลาดลืมของมีใจหมองต่ำก๊อย บ่ใฝห้อยเงินคำ พยาธีขำคิงร่าง บ่มีวันสร่างเมามาย เมื่อใดจะหายเหมือนเก่า ตุ๊กร้อยเต่าปันตี พ่องก็บ่ดีเกิ๋นขนาด ใจ๋ดำฝาดจ๋าแจ็ง จ๋าฟันแตงปั่นฆ่า ใจ๋ปั๋นบ้าเมาวิน เซาะหากิ๋นเลี้ยงใส้ บ่ได้เว้นได้ว่าง เซาะหาตางกิ๋นง่าย สุร่ายล่ายเงินทอง แอ่วผกปองลี้ปล้น มีมากล้นข่าวตังวันยิงฟัน กันบ่ขาดใจ๊อำนาจนอกกฎหมาย เมื่อมันใกล้จะตาย เป็นอนตราย เจ็บป่วย บ่มีใผ่จ่ายเยายา ตุ๊กขะเวต๊ะนาลำบาก ฟังเสียงมันปากอยู่ในคอ ตุ๊กใจ๋แต้ หนอยามเจ็บป่วย จักเอาสังมาจ่วยหื้อหายมรณาความต๋ายเกิดใกล้ เถิงเราบ่ใดร่ได้มันตึง ไล่มาหา มัจจุราชเป็นใหญ่ มันขับไล่อยู่ตึงวันอะโห วะตะ ตุ๊กขัง ปุ๋นดีใจ๋หายใจ๋ขาด ด้วยพยาธิ์ โรกา พ่องก็มรณาเมี้ยนจ๊าด จีวิตขาดเป็นผี พ่องยังอ้วนพีหนุ่มถ๋ำยังบ่อตันจักแก่อยู่กับป่อแม่ บ่ได้หลายขวบหลายปี๋ มาตายเป็นผีม้างจ๊าด ก็ด้วยพยาธ์นานา พ่องกำลังฮิหาเหล้นม่วน ต๋ายด้วยรีบด่วนตันยาต๋ายต๋ามมัคคาตางใต่ รถน้อยใหญ่เฉียดแซงกั๋น ต๋ายตึงวันบ่อขาด เพราะความบระมาทบ่เก๋งขามขี่ซ้อนสอง ซ้อนสาม ถือแต่ความ เก่งกาจ ถ้าผิดพลาดถึงตาย ตังญิงจายน้อยใหญ่ ขี่รถไต่ถนน ฝูงผู้คนพลุกพล่าน อยู่ในย่านคนหลาย พ่องก็ต๋ายขำตี่ พ่องไปตายโฮงยา เถิงก๋รรมเวลามาใดว่ ความตายเป็นใหญ่กู่ตัวคน พ่องตายโหง เบื่อนฆ่า พ่องตายฟ้าผ่าเสือขม ต๋ายเป็นศพปองไก่ ต๋ายตกต้นไม้ ต๋ายตกน้ำใหญ่จ๋มจัง พ่องตายมัดกังคอตัวเก่า เปื่อนได้เล่าลือนาน พ่องสัตว์เดระฉานขบตอด ปิ๊ดงูงอดเขางา โคนะมะหิงสาจ๊างฆ่าหมาว้อบ้าขบตาย พ่องตายสบายหลับลวด หมอบ่ได้ตรวจก๋ายา พ่องมรณาเร็วรีบ เพราะเกี่ยวบีบปายใน พ่องเป็นหวัดไอไข้เมื่อย เจ็บปวดเมื่อยก็เถิงตาย พยาธิหลายเหลือแหล่ บ่ว่าหนุ่มแก่ญิงจาย นั่งตายนอนตายมีมากนานา พ่องเป็นอั๊วะฮากอหิจาต์ เป็นเหน็บชาอ่อนง่อยแข็งขาป่วยเมินมา สัปป๊ะตุ๊กขาก้วนถูก พ่องต๊ายประสูติ บุตต๋าบูตตี๋ เป็นตุ่มฝีรำมะนาด ปิ๊ษบาดลมกุ๋บ ในต้องปุ๋มตับปอด ลมร้ายจอดผับตั๋ว ไข้เจ้บหัวร้ายขาดสันนิบาตขึ้นขำ ปิ๊ษจ๊งจ๋ำเหน็งหนีบ ตายด้วยรีบเร็วแรง ลงดำลงแดงหลุเลือดต๊องเต้นเดือดตายไป พ่องตายเป็นไอวัณโรค พระพรหม พญายมราช ต๊าวจะตุโลกบาลตั้งสี่ ปายต่ำใต้บาดาล มีครุฑนาคน้ำปรมัยไอศวรแม่ธรณีศรีกุตตะละอำมาตย์ ขออันเจิญมาปัตตาอนุโมต๊ะนาบุญกับมูลศรัทธาผู้ข้าตังหลาย บ่เต่าแต่นั้น อันมูลศรัทธาผู้ข้าได้พร้อมหน้ายื่นยอตาน ขอเป็นยานสเปาคำลำใหญ่ เอามูลศรัทธาน้อยใหญ่ ขี่ข้ามน้ำสมุทรท่าสาคร ถือภวะสงสาร หื้อได้ถึงฝังก้ำหน้า กือพระนิปปานา แม่นจักเกิดมาในดลก๋า บ่ได้เถิงนิปปานาหมั้นเตี่ยง ขอกุศลผลบุญ อย่าเลี่ยงหนีไกล๋ ขอหน้าบุญนี้ไซ้ร นำไปเกิดผะเต้ศอันผาเสริฐสมบูรณ์ ขอหน้าบุญหนุนเตื่อมตุ้ม แก่มูลศรัทธา ผู้ข้าตังหลายจุ๊ผู้จุ๊คน จุ๊น้อยใหญ่ จายญิง นั้นจุ๋งจักมีเทียงแต้ดีหลี นิปปานะปัจจะโย โห ตุ โน